SITA WAKAMATWA KWA TUHUMA ZA UTAPELI KWA NJIA YA MTANDAO WA SIMU

Watu sita wanaosadikiwa kuwa ni matapeli kwa njia ya mtandao wa simu wamekamatwa jijini mwanza baada ya kufanya utapeli kwa watu mbali  mbali kwa njia ya simu huku wakitumia majina ya watu maarufu jijini humo.

Akizungumza na waandishi wa habari kamanda wa polisi jijini Mwanza Valentino Mlohola amesema kuwa, November 5 mwaka huu kijana mmoja anayejulikana kwa jina la Eradius Christian alisajili namba ya simu kwa jina linalofanana na jina la kamanda huyo.

Kamanda huyo amesema kuwa watu hao wamekuwa wakisajili majina yanayofanana na viongozi mbali mbali wa serikali na kujipatia fedha kwa njia ya udanganyifu kwa njia ya simu kitu ambacho ni kosa kisheria na watu hao wamefikishwa kituo cha polisi na upelelezi ukikamilika watafikishwa mahakamani.

Mlohola amesema, kipindi hiki cha kuelekea katika sikukuu za mwisho wa mwaka wananchi wanapaswa kuwa makini kwani matapeli watakuwa wengi katika kutafuta fedha za sikukuuna na amewaomba wananchi wakihisi wizi wa namna hiyo watoe taarifa polisi.